Sermon Title: TAKUS UG ANGAYAN SA KANUNAY
Sermon Text: MGA BUHAT 5:12-42
Sermon Series: DILI MAPUGNGAN: Serye sa Wali Pinaagi sa Basahon sa Mga Buhat. | Ikaduhang Bahin. Ang Simbahan nga Nag-atubang Ubos sa mga Pagsupak.
By: PTR MATIAS MAHUSAY SR.
MGA BUHAT 5:12-42 (ABCEB)
¹² Ug pinaagi sa mga kamot sa mga apostoles, daghan ang mga ilhanan ug mga kahibulongan nga nahimo diha sa mga tawo. Ug silang tanan didto magtigom sa Portico ni Solomon. ¹³ Ug walay bisan usa sa mga dili nila kauban nga nangahas sa pagtipon kanila bisan tuod gitahod sila pag-ayo sa mga tawo. ¹⁴ Ug misamot ka daghan ang mga magtutuo nga nadugang ngadto sa Ginoo, mga pundok sa mga lalaki ug sa mga babaye, ¹⁵ nga tungod niana ilang gidala ang mga masakiton ngadto sa kadalanan ug gibutang sa mga lantay ug mga higdaanan aron nga sa pag-agi ni Pedro bisan sa iyang anino na lamang malandongan unta ang uban kanila. ¹⁶ Ug gikan sa kalungsoran nga kasikbit sa Jerusalem nagpundok usab ang daghang mga tawo nga nagdala sa mga masakiton ug mga gisakit sa mga hugaw nga espiritu ug silang tanan nangaayo.
Gilutos ang mga Apostoles
¹⁷ Apan ang labawng pangulong pari ug ang tanang uban niya, nga mao ang pundok sa mga Saduceo, mitindog nga puno sa kasina ¹⁸ ug ilang gidakop ang mga apostoles ug gibutang sa bilanggoan sa lungsod. ¹⁹ Apan sa pagkagabii, usa ka anghel sa Ginoo miabli sa mga pultahan sa bilanggoan ug gidala sila sa gawas ug giingnan, ²⁰ “Lakaw ug tindog sulod sa Templo ug sultihi ang katawhan sa tanang pulong mahitungod niining maong kinabuhi.” ²¹ Sa pagkadungog nila niini, sila misulod sa Templo sa pagkakaadlawon ug nanudlo. Unya miabot ang labawng pangulong pari ug ang mga kauban niya ug ilang gipatawag ang Sanhedrin ug ang tibuok kadagkoan sa Israel ug nagsugo sila ngadto sa bilanggoan aron sa pagkuha sa mga apostoles. ²² Apan sa pag-abot sa mga tinugyanan, wala nila sila makita didto sa bilanggoan, busa namalik sila ug misugilon nga nag-ingon, ²³ “Nakita namo ang bilanggoan nga maayo gayod nga pagkatrangka ug ang mga bantay nga nagtindog sa mga pultahan. Apan sa among pag-abli niini, walay tawo nga among nakita sa sulod.” ²⁴ Unya sa pagkadungog sa kapitan sa Templo ug sa mga pangulong pari niining pulonga, nangalibog sila pag-ayo mahitungod kanila kon unsay sangpotan niini. ²⁵ Ug may miabot nga nagsugilon kanila, “Tan-awa, ang mga tawo nga inyong gibutang sa bilanggoan nagtindog sulod sa Templo ug nanudlo sa mga tawo.” ²⁶ Busa ang kapitan uban sa mga tinugyanan miadto ug mikuha kanila apan sa walay paggamit ug kusog kay nahadlok man sila nga batoon sa mga tawo.
²⁷ Unya sa nadala na nila sila, gipaatubang nila sila sa Sanhedrin. Ug nangutana kanila ang labawng pangulong pari ²⁸ nga nag-ingon, “Dili ba higpit man kamong gipahimangnoan namo sa dili pagpanudlo pinaagi niining ngalana? Apan tan-awa, ang Jerusalem gilukop ninyo sa inyong pagpanudlo, ug maoy inyong tuyo nga kami ang paninglan sa dugo niining tawhana.” ²⁹ Apan si Pedro ug ang mga apostoles mitubag nga nag-ingon, “Kinahanglan among tumanon ang Dios kay sa mga tawo. ³⁰ Ang Dios sa atong mga katigulangan nagbanhaw kang Jesus nga inyong gipatay pinaagi sa pagbitay kaniya sa kahoy. ³¹ Ang Dios nagtuboy kaniya ngadto sa iyang tuo ingon nga Pangulo ug Manluluwas, aron sa paghatag ug paghinulsol ngadto sa Israel ug kapasayloan sa mga sala. ³² Ug kami mga saksi niining mga butanga ug ingon man usab ang Espiritu Santo nga gihatag sa Dios ngadto sa mga nagtuman kaniya.”
³³ Sa pagkadungog nila niini, sila nangasuko ug buot nga mopatay kanila. ³⁴ Apan sa Sanhedrin, dihay usa ka Pariseo nga ginganlan ug Gamaliel, magtutudlo sa balaod ug tinahod sa tanang tawo, mitindog ug misugo nga pagulaon una sa makadiyot ang mga apostoles. ³⁵ Ug siya miingon kanila, “Katawhan sa Israel, pagmatngon kamo sa inyong buot buhaton niining mga tawhana. ³⁶ Kay sa unang mga adlaw, si Teudas mitungha nga nagpaila sa iyang kaugalingon nga bantogang tawo ug may mga tawo nga misunod kaniya nga mga upat ka gatos. Apan siya gipatay ug ang tanang misunod kaniya nagkabulagbulag ug nangahanaw. ³⁷ Human niini si Judas nga Galileanhon mitungha sa mga adlaw sa pagpanglista ug nakadani ug mga tawo sa pagsunod kaniya. Siya usab nalaglag ug ang tanang misunod kaniya nagkabulagbulag. ³⁸ Busa niini karon, sultihan ko kamo, ayaw ninyo hilabti kining mga tawhana ug pasagdi lamang sila. Kay kon kining katuyoan o gimbuhaton iya ra sa mga tawo, mapakyas kini ³⁹ apan kon kini iya man sa Dios, dili gayod kamo makapugong kanila. Makita pa hinuon kamo nga nakigbatok sa Dios!”
⁴⁰ Busa sila mipatuo sa iyang tambag, ug sa natawag na nila ang mga apostoles, gipalatos nila sila ug gipahimangnoan nga dili na gayod mosulti pinaagi sa ngalan ni Jesus, ug gibuhian sila. ⁴¹ Ug gikan sa atubangan sa Sanhedrin, sila mibiya nga nagmalipayon kay giisip sila nga takos nga moantos sa kaulawan tungod sa iyang ngalan. ⁴² Ug matag adlaw, sa Templo ug sa balay, sila wala mohunong sa pagtudlo ug sa pagwali nga si Jesus mao ang Cristo.
KINATIBUK-AN SA WALI
3 ka punto nga atong pagatun-an:
I. Ang Dios ang Magbukas sa Kahigayunan. (vv 17-18, v20)
II. Ang Dios ang Maghatag sa Buluhaton. (vv 28 – 30, v32)
III. Ang Dios Magganti sa Malahutayon. (vv 41-42)