Sermon Title: PAGLANTAW UG PAGPANLAKAW
Sermon Text: MGA BUHAT 1:1-11
Sermon Series: DILI MAPUGNGAN: Serye sa Wali Pinaagi sa Basahon sa Mga Buhat. – Unang Bahin. Pagsugod nga Puno sa Espiritu
By: PTR MATIAS MAHUSAY SR.
Mga Buhat 1:1 – 11 (ABCEB)
Sa una nakong basahon, O Teofilo, naghisgot ako mahitungod sa tanang butang nga gisugdan ni Jesus sa pagbuhat ug pagtudlo, hangtod sa adlaw sa pagbayaw kaniya, human siya maghatag ug sugo pinaagi sa Espiritu Santo ngadto sa mga apostoles nga iyang gipili. Human sa iyang pag-antos, mipakita siya kanila nga buhi pinaagi sa daghang mga pagpamatuod, nagpakita ngadto kanila sulod sa 40 ka adlaw ug nagsulti kanila mahitungod sa gingharian sa Dios. Ug samtang diha pa siya uban kanila, mitugon siya kanila sa dili pagbiya sa Jerusalem kondili sa pagpaabot sa saad sa Amahan, nga matod pa niya, “inyong nadungog gikan kanako, si Juan nagbautismo pinaagi sa tubig, apan sa dili madugay bautismohan kamo pinaagi sa Espiritu Santo.”
Unya sa nagkatigom sila, nangutana sila kaniya, “Ginoo, niini bang panahona nimo ibalik ang gingharian ngadto sa Israel?” Siya miingon kanila, “Dili alang kaninyo ang pagkahibalo sa mga takna o sa mga panahon nga gitakda sa Amahan pinaagi sa iyang kaugalingong pagbuot. Apan makadawat kamo ug gahom sa diha nga mokunsad na kaninyo ang Espiritu Santo ug kamo mao unya ang akong mga saksi sa Jerusalem ug sa tibuok Judea ug Samaria ug hangtod sa kinatumyan sa kalibotan.” Human siya makasulti niini, samtang nagtan-aw sila kaniya, gibayaw siya ngadto sa itaas ug gikuha siya sa usa ka panganod gikan sa ilang mga panan-aw. Ug samtang nagtutok pa sila sa langit sa dihang nagpaingon siya sa itaas, dihay duha ka lalaki nga nagtindog duol kanila, nagbisti ug puti, ug miingon, “Mga tawong Galileanhon, nganong nagtindog man kamo nga nagtutok sa langit? Kining maong Jesus nga gikuha gikan kaninyo ngadto sa langit, mobalik ra unya sa samang paagi nga siya inyong nakita nga nagpaingon sa langit.”
KINATIBUK-AN SA WALI
3 KA MAHINUNGDANONG PUNTO:
1. Gipahimutang sa Dios.
Ang Dios nagpahimutang sa tanan pinaagi sa pagtukod sa pundasyon sa unang simbahan pinaagi sa padayon nga buhat ug pruweba ni Jesus.
2. Gisaad nga Balaang Gahum.
Kini ang gipangayo ni Jesus sa iyang langitnong Amahan aron makabaton ug balaang gahum ang Iyang mga tinun-an.
3. Gimantala sa Tibuok Yuta.
Pagmantala sa ebanghelyo sa tanang mga nasud sa tibuok kalibutan sugod mismo sa imong gigikanan
PANAPOS:
Nagtudlo sa mga magtutuo nga mosalig sa gahum sa Dios, pinaagi sa Balaang Espiritu. Magtutok sa aktibong pagsaksi kay sa pagpangagpas, ug magpuyo nga masaligon nga nagpaabot sa pagbalik ni Cristo.